Þessi uppskrift er ein af mörgum úr
jólamáltíð
að hætti hjónanna í Kryddhúsinu.
Þú finnur uppskrift að JÓLAKALKÚN
KRYDDHÚSSINS – HÉR!
og uppskrift að MEÐLÆTI MEÐ
KALKÚNANUM – HÉR!
Svo er líka uppskrift
að HÁTÍÐASALATI – HÉR!
Það er svo dásamlegt að fá uppskrift að
heilli jólamáltíð svona á einu bretti!
Engin máltíð er alveg fullkomin fyrr en eftirrétturinn toppar hana. Hér gefur Ólöf Einarsdóttir í Kryddhúsinu okkur uppskrif að spennandi eftirrétti, sem á örugglega eftir að kveikja í bragðlaukunum hjá mörgum
KANIL- OG PEKANHNETU ÍS MEÐ KRYDDLEGNUM PERUM
INNIHALDSEFNI Í ÍSNUM
500 gr pekanhnetur
3-4 msk hlynsíróp
1 tsk kanill malaður frá Kryddhúsinu
AÐFERÐ VIÐ HNETURNAR:
1 – Blandið hlynsírópinu og kanilnum saman í skál og veltið pekanhnetunum upp úr kanilsírópinu.
2 – Dreifið hnetunum á smjörpappírsklædda ofnplötu og ristið í 180° C heitum ofni í u.þ.b. 10 mín.
3 – Þá er platan tekin út og hneturnar látnar kólna svo þær verði stökkar í ísnum.
INNIHALDSEFNI Í ÍSBLÖNDUNA
2 bollar rjómi
1 bolli mjólk
2/3 bollar hrásykur
1-2 tsk vanilla
1 msk Kanill malaður frá Kryddhúsinu
5 eggjarauður (hrærðar)
AÐFERÐ VIÐ ÍSINN:
1 – Setjið rjómann, mjólkina og kanilinn í pott og hitið nær suðu.
2 – Þegar hliðarnar byrja að krauma takið þá pottinn af hellunni, lækkið strauminn á miðlungs hita og takið eins og 1/3 bolla af heitri rjómablöndunni og hellið í mjórri bunu út í skálina með hrærðu eggjarauðunum.
3 – Passið að hræra í allan tímann. Þetta er gert 2-3 sinnum til að tempra eggjarauðurnar. Hellið svo eggjarauðunum út í pottinn og setjið á helluna og látið krauma án þess að sjóði þar til hræran fer að þykkna.
4 – Mikilvægt að standa hjá pottinum og hræra annað slagið í annars er hætta á að eggjarauðurnar fari að skilja sig og þá er hræran ónýt.
5 – Þetta tekur u.þ.b. 10 mín. Þegar hræran helst aftan á skeið án þess að leka af þá er hún tilbúin.
6 – Bætið vanillunni út í og látið hræruna kólna áður en grófskornum pekanhnetunum eru bætt útí og ísinn settur í ílát með loki og inn í frysti.
Mér finnst betra að setja blönduna í ísvél en þannig verður ísinn léttari og „rjómakenndari“ en það gengur vel að sleppa því að nota ísvél.
Athugið! Það er gott að leggja plastfilmu ofan á yfirborðið áður en lokið er sett á til að varna því að það myndist klaki.
Takið ísinn út úr frysti eins og 10-15 mín áður en hann er borinn fram.
RAUÐVÍNSLEGNAR PERUR Í JÓLAGLÖGGSSÍRÓPI
Það er smart að bera þessar perur fram með KANIL- OG PEKANHNETUÍSNUM eða einar sér með þeyttum rjóma. Þær krefjast smá undirbúnings en er það ekki einmitt það sem við leyfum okkur um jólin, að verja meiri tíma í matarundirbúning en aðra daga.
PERURNAR OG SÍRÓPIÐ
1 lítri rauðvín (ég nota ódýrt beljuvín)
2 kúfaðar msk Jólaglöggskryddblanda frá Kryddhúsinu
500 gr hrásykur
6-8 litlar perur eða færri stærri og þá skera þær til helminga.
AÐFRÐ:
1 – Setjið rauðvínið í stórann pott ásamt Jólaglöggskryddinu og hrásykrinum. Látið suðuna koma upp og sjóðið á meðan þið græjið perurnar eða í u.þ.b. 10-15 mín.
2 – Það er fallegt að hafa litlar perur en ef þær fást ekki þá má nota þessar venjulegu en skera þær þá til helminga. Kjarnhreinsið perurnar og setjið þær út í sjóðandi rauðvínið.
3 – Látið sjóða í 20-30 mín eða þar til perurnar eru orðnar mjúkar í gegn (passið að mauksjóða þær ekki).
4 – Veiðið þá perurnar upp úr pottinum og látið rauðvínssírópið sjóða niður þar til þið eruð sátt við þykkt/áferð sírópsins.
5 – Sigtið þá kryddið frá og hellið sírópinu í krukku. Þetta má gera daginn áður og geyma perurnar í lokuðu íláti inn í ísskáp.
6 -Gott er að taka perurnar úr ískápnum þó nokkru áður en þær eru bornar fram eða að taka svolítið síróp og hita í potti með perunum til að fá þær mýkri áður en þeirra er neytt.
7 – Hellið aðeins af sírópinu yfir perurnar og berið þær þannig fram með ísnum. Restina af sírópinu má nota til að bragðbæta sósur, út á hvers kyns eftirrétti eins og Ris a la mand, í heita drykki svo eitthvað sé nefnt. Það geymist vel í lokuðu íláti á svölum stað.
Jólaglöggssírópið er til dæmis frábært út í sósuna með JÓLAKALKÚNANUM
Myndir: Ólöf Einarsdóttir
Kryddin frá Kryddhúsinu fást í Hagkaup, Krónunni, Nettó og Fjarðarkaupum – og á Kryddhus.is.
—
Um höfund
- Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
Síðustu færslur
Greinar26. mars, 2026TVEIR ÁHRIFAVALDAR
Greinar23. mars, 2026FRÁ FRÆI TIL FRAMVINDU
Greinar21. mars, 2026MERKÚR BREYTIR UM STEFNU
Greinar20. mars, 2026JAFNDÆGUR 20. MARS