GULRÓTA- OG ENGIFERSÚPA

Guðjón sonur minn benti mér á þessa uppskrift sem hann fann á www.themediterraneanDish.com vefsíðunni. Hann hefur nú hingað til ekki verið mikill súpumaður, svo þegar hann segist hafa eldað magnaða súpu, varð ég auðvitað að prófa – og síðan deila með ykkur – því hún er svo sannarlega frábær.

Hún er fín á köldum dögum og hentar vel fyrir þá sem eru á HREINT MATARÆÐI hreinsikúrnum með smá breytingum, því hún fellur alveg að ráðlögðum matarlista. Með því að baka gulræturnar fyrst, næst fram sæta bragðið í þeim og súpan bragðast ótrúlega vel.

Ég dreif því í að þýða uppskriftina, sem er fyrir svona 4-6 eftir því hvað hver borðar mikið og hvaða meðlæti er með súpunni. Hún smakkast örugglega vel með HUSKBOLLUR ÖNNU HEIÐU. Þær átti ég ekki til, svo ég fékk mér Chestnut brauðþynnur (hrökkbrauð) frá Le Pain des Fleurs og smur-geitaost frá Chavroux, og saman smakkaðist þetta æðislega vel.

INNIHALDSEFNI:

1 1/2 kg gulrætur, vel þvegnar og snyrtar og afhýddar ef með þarf
extra virgin – jómfrúar – ólífuolía t.d. frá Himneskri hollustu eða Naturata
himalajasalt og pipar
4 hvítlauksrif, söxuð
1 tsk rifin fersk engiferrót
5 1/2 bolli vatn blandað grænmetiskrafti eins og til dæmis frá Naturata
1 tsk malað kóríander
1 tsk allrahanda (krydd)
1 1/2 bolli matreiðslurjómi fyrir þá sem eru ekki á HREINU MATARÆÐI
– annars 1 bolli möndlumjólk eða kókosmjólk
Svo má skreyta súpuna með ferskum myntulaufum eða steinselju

AÐFERÐ:

1 – Hitið ofninn í 220°C.
2 – Raðið þerruðum gulrótunum á plötu með bökunarpappír (eða silikonmottu) sem þið hafið aðeins penslað með ólífuolíu. Dreifið ólífuolíu yfir gulræturnar (þær eiga að vera heilar, þótt ég hafi skorið mínar í tvennt langsum í smá fljótfærni) og setjið salt og pipar yfir.
3 – Bakið í 45 mínútur, en snúið gulrótunum þegar helmingur af tímanum er liðinn.
4 – Þegar gulræturnar er orðnar mjúkar í gegn, takið þær þá úr ofninum og látið aðeins kólna.
5 – Á meðan gulræturnar eru að bakast, er gott að rífa engifer og hita vatn og blanda grænmetiskrafti út í það, svo hann sé tilbúinn.
6 – Skerið gulræturnar í bita og setjið í stóra matvinnsluvél eða blandara ásamt hvítlauk, engifer og 3 bollum af soðinu. Ef þið eigið ekki stóran blandara, skiptið þá magninu upp. Ég á AEG blandara og set hann á “Smooth” til að mauka gulræturnar vel.
7 – Setjið gulrótamaukið út í góðan súpupott, bætið því sem eftir var af soðinu við, svo og kóríander og allrahanda kryddinu.
8 – Stillið á miðlungshita og látið súpuna hitna þar til hún fer að krauma. Hrærið reglulega í á meðan.
9 – Lækkið undir súpunni og bætið möndlumjólk, kókosmjólk eða matreiðslurjóma út í hana. Ég átti reyndar bara rísmjólk frá Isola og súpan bragðaðist vel með henni.

Myndir: Guðrún Bergmann

image_print

Um höfund

Guðrún Bergmann
Guðrún Bergmann
Guðrún Bergmann hefur í tæp 29 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
  • 187 Posts
  • 0 Comments
Guðrún Bergmann hefur í tæp 29 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar