MIÐ-AUSTURLENSKUR KJÚKLINGARÉTTUR

Ég elska svona rétti sem eru “allt í einum potti” og ekki er nú vera þegar þeir smakkast eins vel og þessi. Ég fann hann á TheMediterraneanDish.com og breytti honum smávegis til að hann hentaði sem flestum og útkoman varð dásamleg. Ég skrapp í Kryddhúsið til að ná mér í hluta af kryddinu sem nota þarf í réttinn, en kryddin og kryddblöndurnar hjá þeim eru alveg dásamlegar.

Svo var þessi glútenlausi réttur prófaður í vinkonuboði þar sem hann sló algerlega í gegn.

INNIHALDSEFNI:

Kryddblandan:

2 tsk malað allrahanda
1 tsk svartur pipar (minna ef ykkur finnst þetta of mikið)
3/4 tsk malaðar grænar kardimommur
1/4 tsk malað túrmerik

Í réttin sjálfan:

3 kjúklingabringur skornar í frekar stóra bita, veljið kjúklinga sem ræktaðir eru án sýklalyfja
fínt himalajasalt
Extra virgin ólífuolía – ég notaði olíuna frá Naturata
1 meðalstór gulur laukur, skorinn smátt
4 gulrætur, skornar í svona 1 cm þykkar sneiðar
1 bolli frosnar grænar ertur (baunir)
2 bollar glútenlaus Basmati grjón (hægt að nota þau sem soðin eru í poka) – skolið vel með köldu vatni fyrir matseld
2 kanilstangir
1 þurrkað lárviðarlauf
2 bollar sjóðandi vatn með kjúklingakrafti – eða grænmetiskrafti

AÐFERÐ:

1 – Byrjið á að blanda öllu kryddinu saman í litla skál.

2 – Þerrið kjúklingabringurnar og skerið í stóra bita. Kryddið vel með salti og síðan með kryddblöndunni. Notið fingurnar til að dreifa henni vel yfir bitana, svo það sé krydd á þeim öllum. Látið bitana standa við stofuhita í ca 20 mínútur meðan grænmetið er skorið og sósan útbúin.

3 – Hitið 3 msk af ólífuolíunni upp að meðalhita í stórum, víðum potti með loki. Brúnið kjúklingabitana í olíunni þar til þeir loka sér. Það þarf ekki að elda þá í gegn. Takið bitana úr pottinum og setjið í skál.

4 – Bætið lauknum, gulrótunum og baununum út í pottinn. Látið grænmetið krauma í olíunni í 4 mínútur eða svo og hrærið reglulega í á meðan. Bætið þá hrísgrjónunum út í og ef þið viljið mjög bragðsterkan rétt, bætið þið 1/2 tsk af allrahanda og 1/4 tsk af kardimommum út í og hrærið allt  vel saman.

5 – Bætið kjúklingabitinum út í pottinn og raðið þeim inn á milli grjónanna. Bætið kanilstöngum, lárviðarlaufi og soðinu (kjúklinga- eða grænmetis-) út í pottinn. Látið suðuna koma upp.

6 – Lækkið hitann, setjið lokið á pottinn og látið sjóða í 20 mínútur.

MEÐLÆTIÐ:

TSATZIKI SÓSA:

hálf (stór) dós af laktósafrírri grískri jógúrt frá Örnu
1 tsk Tsatziki kryddblanda frá Kryddhúsinu
1/2 gúrka, afhýdd, kjarnhreinsuð og rifin á grófu rifjárni

Gott er að byrja á að útbúa sósuna, því þá getur hún tekið í sig kryddbragðið meðan eldað er.
Hrærið kryddinu út í jógúrtina.
Látið vatnið renna af gúrkubitunum og kreistið vökvann úr þeim með eldhúsrúllublaði.
Bætið gúrkunum út í jógúrtina og sósan er tilbúin.

GÚRKU OG GRANATEPLASALAT:

Innihaldsefni:

1 gúrka, skorin í litla bita
fræ úr einu granatepli – látið safann fylgja með í salatið
2 vorlaukar, skornir í þunnar sneiðar
nokkur fersk, rifin myntulauf
fínt himalajasalt

Salatsósan:

1/4 bolli extra virgin ólífuolía (ég notaði Naturata)
2 msk hvítvínsedik
1/2 tsk hvítlauksduft (eða 1-2 pressuð hvítlauksrif)
3/4 tsk allrahanda (kryddið er úr möluðum berjum)
1/2 tsk sumac krydd

Blandið salatsósunni saman og hellið yfir salatið.

Myndir: Guðrún Bergmann
Neytendaupplýsingar: Kryddin frá Kryddhúsinu fást hjá þeim á Flatahrauni 5B, í Hagkaup, Fjarðarkaup og Nóatúni.

image_print

Um höfund

Guðrún Bergmann
Guðrún Bergmann
Guðrún Bergmann hefur í tæp 29 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
  • 199 Posts
  • 0 Comments
Guðrún Bergmann hefur í tæp 29 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar