HUGLEIÐSLA UM ALLA JÖRÐ 1. MAÍ
Samtökin Global Peace Meditation hvetja til hugleiðslu um alla Jörð mánudaginn 1. maí. Við erum hvött til að taka þátt í öflugustu örvun Plánetunnar hingað til. Með því að sameina orku okkar á þessum degi á sama tíma frá kl. 17:06 (miðað við UTC eða GMT tíma) um allan heim getum við upphafið orkuna fyrir Öld Vatnsberans á næsta stig.
Þetta er tækifæri fyrir heildina (mannkynið) til að hraða frelsun plánetunnar, sem hefur nú þegar tekið allt of langan tíma. Allir geta tekið þátt hvar sem þeir eru staddir, svo framarlega sem þeir velja að setjast niður kl. 17:06 hér á landi til að taka þátt í hugleiðslunni. Reyndar má líka gera það standandi, en hvort heldur sem valið er hvet ég sem flesta til að leggja sitt af mörkum með því að taka þátt í umbreytingunni.
LJÓSGÁTTIN
Stefnt er að því að fá 144.000 einstaklinga til að taka þátt í því að opna LJÓSGÁTTINA frá miðju Vetrarbrautarinnar að fullu á réttu augnabliki í lok mjög öflugs hringferlis. Augnablikið miðast við þann tímapunkt þegar orkan frá miðju Vetrarbrautarinnar (Galactic Center) byrjar að streyma í átt að yfirborði Plánetunnar okkar af fullum krafti.
Takist að ná saman 144.000 sjálfboðaliðum sem vinna að þessari virkjun, mun verða jafnvægi þegar orkan frá miðju Vetrarbrautarinnar tengist yfirborði Plánetunnar. Slíkt myndi leiða til hröðustu og samfelldustu umskipta á Jörðinni og í raun tryggja orkumikla uppfærslu fyrir alla Plánetuna.
Takist ekki að ná lágmarksfjölda, mun hin ofurkraftmikla orka frá miðju Vetrarbrautarinnar engu að síður ná yfirborði Plánetunnar, en kemur þá til með að staðfestast á mun óskipulegri og ósamræmdari hátt.
TAKTU ÞÁTT Í UMBREYTINGUNNI
Notum þetta tækifæri og leyfum þessari stóru umbreytingu að eiga sér stað fyrir allt mannkyn! Framlag hvers og eins skiptir máli og við ættum að geta náð krítískum lágmarksfjölda eða 144.000 manns, til að virkja orkuna. Slíkt myndi leiða til gríðarmikillar heilandi keðjuverkunar í öllu orkusviði Jarðar.
Með þátttöku ertu hluti af einhverju stærra en mannkynið hefur áður gert! Vertu með í öflugustu virkjun Plánetunnar hingað til!
PLÚTÓ Í VATNSBERA
LJÓSGÁTTIN byrjaði aðeins að opnast þann 23. mars, þegar Plútó fór inn í Vatnsberann í fyrsta skipti eftir rétt um 250 ár. Hún mun ná hámarksstyrk sínum þann 1. maí þegar Plútó stöðvast til að fara afturábak um sporbaug sinn. Hún mun svo hægt og rólega lokast þann 11. júní þegar Plútó fer úr Vatnsberanum og aftur inn í Steingeitina.
Á því augnabliki sem LJÓSGÁTTIN vikjast alveg þann 1. maí, verður Plútó á núll gráðu og tuttugu og einni mínútu í Vatnsberanum. Það er næstum því nákvæmlega sama gráða og samstaðan á milli Júpíters og Satúrnusar varð á í desember árið 2020, en hún markaði síðasta hlutann í virkjun á Öld Vatnsberans.
STÓR ÞRÍHYRNINGUR
Samtímis því sem virkjunin á sér stað, myndar Plútó stóran þríhyrning, annars vegar með 120 gráðu afstöðu við Alcyone (staðbundin Sólstjarna okkar í Sjöstirninu – skrifa einmitt um þá Sólstjörnu í bók minni LEIÐ HJARTANS) á núll gráðu og átján mínútum í Tvíbura og samskonar afstöðu við vetrarbrautina M87, sem er stór vetrarbraut í Meyjarþyrpingunni, en hún er uppspretta kærleikans í þessum hluta Alheimsins og er á einni gráðu og fjórtán mínútum Vog.
Þessi stóri þríhyrningur mun senda öfluga kosmíska kærleiksorku til Jarðar. Sú orka mun verða kveikjan að því að orkan frá miðju Vetrarbrautarinnar fari að flæða óheft til Plánetunnar okkar. Þessi blossi kosmískrar kærleiksorku sem kemur frá M87 Vetrarbrautinni í ofurþyrpingu Meyjunnar verður mun öflugri en blossinn sem náði til Jarðar frá M87 þegar AION gáttin virkjaðist.
Þessi kærleiksblossi verður líka öflugri en blossinn sem varð við síðustu virkjun á Öld Vatnsberans, en þegar LJÓSGÁTTIN virkjast uppfærist orkan fyrir Öld Vatnsberans upp á enn hærra stig.
LEIÐBEININGAR FYRIR HUGLEIÐSLUNA
Á nákvæmlega þeim tíma sem hugleiðsluferlið hefst um allan heim eða klukkan 17:06 hér á landi skaltu sitja í þægilegri stöðu og fylgja eftirfarandi leiðbeiningum:
- Notaðu þína eigin tækni til að koma þér í afslappað vitundarástand.
- Settu fram ásetning þinn um að nota þessa hugleiðslu sem afl sem stuðlar að opnun LJÓSGÁTTARINNAR.
- Kallaðu til þín Fjólubláa logann frá uppsprettu hans og umvefðu þig verndandi orku hans bæði á meðan á hugleiðslu stendur og eftir hana. Biddu logann um að umbreyta öllu sem þjónar ekki LJÓSINU.
- Sjáðu fyrir þér stólpa af ljómandi hvítu LJÓSI sem stafar frá hinni Kosmísku Sólstjörnu og dreifist síðan til Sólstjarna allra Vetrarbrauta í þessum Alheimi og streymir einnig í gegnum Sólstjörnu M87 Vetrarbrautarinnar. Sjáðu síðan fyrir þér hvernig þetta LJÓS virkjar hina Kosmísku Sólstjörnu og fer síðan í gegnum Vetrarbrautina okkar og inn í Sólkerfi okkar þar sem það virkjar allar LJÓSVERUR í Sólkerfi okkar og streymir svo í gegnum allar verur á Plánetunni Jörð, þar með talið líkama þinn og endar inni í miðju Jarðar.
- Sjáðu fyrir þér að þetta LJÓS umbreyti öllu myrkri sem eftir er á Jörðinni, leiðrétti allan ójöfnuð, bindi enda á öll stríð, eyði allri fátækt og færi öllu mannkyni allsnægtir. Sjáðu fyrir þér mikla andlega vakningu mannkyns og tengingu við jákvæða kynþætti af verum í geimnum. Sjáðu fyrir þér hina nýju kosmísku hringrás í Öld Vatnsberans hefjast og færa með sér tært LJÓS, KÆRLEIKA OG HAMINGJU til allra sem á Jörðinni búa.
Nánari upplýsingar: Hægt er að finna þessa hugleiðslu leidda á ensku inni á síðu Global Peace Meditation. Ef þú vilt ekki hlusta á hana á ensku geturðu lesið textann hér að ofan inn á símann þinn og spilað leiðbeiningarnar svo þegar þú hugleiðir. Ráðlögð lengd þessarar hugleiðslu er um 20 mínútur.
Deildu þessum upplýsingum endilega til allra sem þú heldur að myndu hafa áhuga á að taka þátt í þessari hugleiðslu.
Þér er velkomið að skrá þig á PÓSTLISTANN minn til að fá reglulega sendar greinar um sjálfsrækt, andleg málefni, stjörnuspeki og náttúrulegar leiðir til að styrkja heilsuna.
Myndir: Af vef Global Peace Meditation
Um höfund
- Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
Síðustu færslur
Greinar19. janúar, 2025FYRSTA NÝJA TUNGL ÁRSINS 2025
Greinar16. janúar, 2025HVER STJÓRNAR ÞÍNUM LÍKAMA?
Greinar13. janúar, 2025FULLT TUNGL Í DAG
Greinar11. janúar, 2025YFIRLIT YFIR ÁRIÐ 2025