HREINN LÍFSSTÍLL

Pælingar um heilsusamlegra líferni, sérfæði og séróskir á veitingastöðum, þegar fólk hagar sér eins og Hollywood stjörnur og pantar ekki það sem er á matseðlinum eða pantar einhvern rétt, mínus kartöflur og sósu, en plús snöggsteikt grænmeti – telst ekki lengur vera sérviska fárra, heldur lífsstíll margra. Daglegt val um heilsusamlegra líferni hjá fólki sem vill hugsa vel um líkama sinn og heilsu er orðið að staðreynd.

Miklar breytingar hafa orðið á neysluvenjum fólks á síðari árum og heilsufæði, sem fyrir tæpum þrjátíu árum fékkst einungis í einni verslun í Reykjavík, sem var opin takmarkaðan tíma á dag, fæst nú í öllum helstu stórvörumörkuðum landsins. Á síðasta áratug eða svo hefur skilningur og þekking á mannslíkamanum einnig aukist mjög. Vísindalegar rannsóknir sýna nú að við getum stýrt ýmsu um heilsu okkar og gert breytingar þar á með breyttum lífsstíl.

NÝR OG BETRI LÍFSSTÍLL
Fyrir mér er þetta HREINN LÍFSSTÍLL og þess vegna hef ég ákveðið að gefa væntanlegri bók minni þann titil. Við erum það sem við borðum og við erum líka það sem við hugsum, eða kannski öllu heldur trúum. Þegar við sleppum tökum á gömlum hugmyndum, lærum eitthvað nýtt og tekst að tileinka okkur það getum við snúið við ótal lífsstíls- og sjálfsónæmissjúkdómum, sem því miður hrjá fjöldann allan af fólki víða um heim í dag.

Mín leið til að hvetja fólk til að gæta helsu sinnar hefur legið í gegnum greinaskrif, námskeiðin HREINT MATARÆÐI, fyrirlestra og bókaskrif. Verndun heilsunnar er daglegt verkefni, líkt og að fara í sturtu eða bursta í sér tennurnar. Það felst ekki í neinum skyndilausnum eða kúrum, heldur í breyttum lífsstíl til frambúðar.

Ég hef lært í gegnum tíðina að ég get stundað líkamsrækt af kappi og tekið öll bestu bætiefnin, en ef ég borða ekki mat sem styður við líkamann og veldur ekki bólguviðbrögðum eða öðrum vandamálum, skiptir hitt ekki máli. Niðurstaða mín af öllum þeim tilraunum sem ég hef tekið sjálfa mig í gegnum, og þær spanna síðustu þrjátíu ár, er einfaldlega sú að maturinn er mikilvægastur. Bætiefnin eru svo akkúrat það sem felst í orðinu, efni sem bæta mér upp það sem vantar í fæðuna og líkamsræktin styrkir mig og veitir mér liðleika. Samanlagt veita þessir þættir mér aukin lífsgæði.

EINFALDAR OG BRAGÐGÓÐAR UPPSKRIFTIR
Í nýju bókinni minni hef ég í mataruppskriftunum einbeitt mér að því að hafa einfaldan mat, sem hægt er að útbúa og elda á innan við klukkustund – sumir taka mun styttri tíma – frá því komið er heim úr vinnu og sest niður til að borða. Ekki hafa áhyggjur! Það tekur ekki mikið lengri tíma að elda uppskriftirnar sem tilheyra laugar- og sunnudögum.

Uppskriftirnar taka mið af því sem ég hef heyrt og fundið hjá þátttakendum á námskeiðunum mínum. Flestir borða enn mest af fiski og kjöti, þótt grænmetisréttir séu aðeins prófaðir með og þess vegna hef ég sett fókus á að hafa uppskriftirnar í samræmi við það.

Svo verður auðvitað fullt af fræðslu í henni líka, því með aukinni þekkingu er hægt að taka breyttar og betri ákvarðanir.

Bókin kemur út síðari hluta ágústmánaðar, en ég mun bjóða hana í forsölu með miklum afslætti til þeirra sem eru á póstlistanum mínum strax í júní. Svo fer hún í almenna forsölu í framhaldi af því.

Mynd: Tók myndina með greininni, þegar við sem unnum að myndatöku fyrir bókina settumst niður til að borða nokkra rétti sem eldaðir höfðu verið. Á henni er hjarðsveinsbaka, pönnusteiktur silungur og grænmetis lasagna.
#hreinnlifsstill – #hreinnlífsstíll

image_print
Deila áfram:

Um höfund

Guðrún Bergmann
Guðrún Bergmann
Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
  • 503 Posts
  • 0 Comments
Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
error

Viltu deila þessari grein?