AÐ LIFA Í NÚINU

28/07/2019

Ég segi gjarnan við erlenda vini mína að þeir læri að lifa í núinu ef þeir koma til Íslands. Í mínum huga er einföld skýring á því og hefur ekkert með núvitundarnámskeið að gera. Þjóðin hefur í aldir alda lært að grípa tækifærin þegar þau gefast. Það hefur verið farið á sjó þegar gefur og tún slegin þegar þurrt er.

Þegar ég rak hótel á Hellnum voru gestirnir oft að spyrja ráða um ferðir á Jökulinn. Ef veður var gott hvatti ég þá oft til að fara í miðnæturferð á Snæfellsjökul, sem hefði þýtt að þau hefðu verið að koma til baka á hótelið um klukkan hálftvö um nóttina.

Nei, fólk hætti við því það vildi fara snemma að sofa. Stefndi frekar á að fara næsta morgun. Ég benti þá gjarnan á að það gæti sofið þegar heim kæmi. Tækifæri til að fara á Jökul væri nýtt þegar það byðist, en ekki þegar fólk vildi fara. Þetta áttu flestir erfitt með að skilja og margir lentu í því að ekki gaf á Jökulinn næsta dag.

ÞETTA REDDAST

Við Íslendingar erum óskipulögð þjóð. Fyrir utan þá staðreynd að allir eru kóngar hér á landi, held ég að það tengist því að við höfum aldrei haft her. Við höfum því aldrei þurft að gangast undir strangan aga. Það ríkti aðeins meiri agi og reyndar líka virðing hér áður fyrr meðan þéringar voru við líði, en eftir að þær duttu niður og við fórum í gegnum hippatímann týndist það allt.

Víða erlendis skipuleggur fólk til dæmis sumarfríin sín ári og jafnvel tveimur fyrirfram. Fæstir hér á landi skipuleggja fríin sín svo langt fram í tímann, heldur er rokið af stað annað hvort á síðustu stundu vegna þess að verður er gott eða það býðst tilboð á flugi, af því veðrið heima er vont.

Gamla viðkvæðið: „Þetta reddast!“ er þá gjarnan notað, hvort sem átt er við vinnuna eða skólann sem stokkið er úr. Svo er bara farið í smá átaksvinnu þegar heim er komið, eins og landsmenn hafa svo oft áður gert, hvort sem verið var að bjarga afla eða heyjum.

ÚTLENDINGAR NÁ ÞESSU EKKI

Útlendingar, einkum og sér í lagi Þjóðverjar, eiga erfitt með að skilja þetta óskipulag okkar. Þeim finnst það óþægilegt, því það togar þá út úr þeirra þægindaramma, líkt og gerist hjá okkur þegar við komum inn í menningarheim, þar sem skipulag er mikið og því fylgt út í ystu æsar.

Hugsanlega væri gott að hafa einhvern milliveg á málum hér á landi, en þar til hann er fundinn kunnum við alla vega að lifa í núinu.

P.S. Set með mynd af Snæfellsjökli. Ég tók hana í sumar, þegar fjölskyldan tók með stuttum fyrirvara ákvörðun um að fara á Jökul, af því veður var svo gott. Við kunnum að lifa í núinu 🙂

Grein og mynd: Guðrún Bergmann