HVER DAGUR ER EINSTAKUR - Guðrún Bergmann

HVER DAGUR ER EINSTAKUR

HVER DAGUR ER EINSTAKUR

Valentínusardagurinn var í gær og ég tók eftir því í ýmsum fréttabréfum sem ég fékk erlendis frá að margir lögðu meiri áherslu á sjálfskærleikann, en kærleik til einhvers annars. Stundum er gott að vera minntur á að við erum einstök hvert og eitt okkar og það er svo sannarlega frábært þegar við lærum að elska okkur sjálf.

Kærleikur í eigin garð á ekkert skylt við sjálfselskar og eigingjarnar tilfinningar, heldur þá virðingu og þá ást sem við sýnum okkur sjálfum, meðal annars með því hvernig við komum fram gagnvart eigin líkama, útliti okkar og umhverfi.

FYRIR SÉRSTAKT TÆKIFÆRI

Foreldrar mínir voru ekki með mikið fé milli handanna meðan þau voru að byggja sér hús og við áttum bara eitt sett af diskum. Þegar húsið var fullbyggt mátti bara borða inni í borðstofu á jólum og páskum – og stöku öðrum hátíðisdögum og sparistellið þegar það var loks keypt, var líka bara notað við sérstök tækifæri. 

Margir hafa lent í því að kaupa sér fatnað sem átti að nota spari, en svo aldrei fundið tækifærið sem var það rétta fyrir fatnaðinn – og þegar hann hefur hangið lengi inni í skáp, er hann gjarnan kominn út tísku þegar á að draga hann fram.

HVERJU MYNDI ÞAÐ BREYTA?

Hverju myndi það breyta fyrir okkur sjálf ef við myndum leyfa okkur að ganga í fallegustu fötunum okkar og borða af sparistellinu dagsdaglega? Værum við ekki með því að senda okkur sjálfum falleg skilaboð um að hver dagur sé einstakur, að honum beri að fagna og að við séum þess virði að njóta hans.

Það felst ákveðin upplyfting í því að leyfa sér að njóta reglulega þess besta sem maður á. Viðmót okkar breytist þegar við klæðum okkur uppá eða leggjum fallega á borð fyrir okkur sjálf og fjölskylduna. Við verðum meðvitaðri um fegurðina og glæsileikann sem felst í raun í hverjum einasta degi.

GEYMT INNI Í SKÁP

Ef þú átt eitthvað inn í skáp, sem þú hefur planað að geyma fyrir sérstakt tækifæri – flösku með einhverju eðalvíni, fallega skó, blússu eða skyrtu sem þú hefur aldrei farið í eða fallegan borðdúk sem ekki hefur verið notaður lengi – gæti verið vel þess virði að draga þetta „eitthvað“ fram og taka það í notkun í kvöld, jafnvel þótt það sé bara mánudagur.

NÚNA er alltaf besti tíminn til að sýna sjálfum sér ást og virðingu, til að fagna hverjum degi og njóta þess besta sem við eigum.

Mynd: Amelia Nicklas Ohlrogge – unsplash.com

image_print

Um höfund

Guðrún Bergmann
Guðrún Bergmann
Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
  • 401 Posts
  • 0 Comments
Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
error

Viltu deila þessari grein?