ER GLÝFÓSAT Í ÞÍNUM MAT?

ágúst 16, 2018 - 9:47 e.h.

Nýlegur dómur í Bandaríkjunum í máli manns með krabbamein á lokastigi – sjá grein á mbl.is – sem hann tengir við áralanga notkun á Roundup í starfi sínu sem garðyrkjumaður hefur vakið marga til vitundar um að til sé eitthvað efni sem kallast glýfósat. Í annarri grein á sama fréttamiðli er svo fjallað um það að Roundup sé mælanlegt í vinsælu morgunkorni – sjá hér – þar sem það er að finna í haframjöli sem notað er við framleiðsluna.

Líklegt er að Roundup eða efni úr því sé víða að finna í fæðukeðjunni, því Roundup er mest notaði illgresiseyðir í heiminum í dag. Hann er ekki bara notaður í Bandaríkjunum, heldur um allan heim og það sem fer í jarðveginn, fer einnig í plöntunar. Um þetta fjallaði ég meðal annars í bók minni HREINN LÍFSSTÍLL sem kom út í fyrra. Hér á eftir fylgir útdráttur úr henni – en í þessum kafla bókarinnar er ég að vísa í viðtal við bandaríska lækninn Dr. Zach Bush.

GLÝFOSAT EYÐILEGGUR LÆKNINGARMÁTT FÆÐUNNAR

Glýfosat, sem er virka efnið í fjölmörgum illgresiseyðum á markaðnum í dag, þar á meðal í Roundup®, kom fyrst á markað árið 1976. Þetta efni drepur þó ekki bara illgresi, því allur gróður sem efninu er úðað á drepst. Monsanto, risinn á eiturefnamarkaðnum, og aðrir framleiðendur illgresiseyða ákváðu þá að búa til erfðabreytt afbrigði af plöntum sem myndu þola illgresiseyði.

En af hverju drepur glýfosat plöntur? Bestu skýringuna gefur Bush sjálfur sem segir: „Glýfosat blokkar ákveðna ensímferla sem kallast shikimate-ferlar. Þessi ensím sjá um að framleiða sum af mikilvægustu efnasamböndum fæðunnar, þar á meðal hringlaga kolefnisform, eins og tryptófan, sem eru uppistaða hormóna. Þegar þessir ferlar eru drepnir í bakteríum og plöntum hverfur tryptófan úr jurtaríkinu og þá getur plantan ekki framleitt þessar nauðsynlegu sameindir sem sjá um merkjasendingar. Með því að blokka shikimate-ferlana hverfa fjórar til sex af nauðsynlegu amínósýrunum, sem alls eru 26 og eru byggingareiningar alls próteins í líkamanum.

Þetta er þó bara hluti af vandanum vegna þess að efnasambönd alkalíða skortir líka í fæðuna. Þegar þeir hverfa úr henni magnast þeir sjúkdómar sem við sjáum leggjast á svo mörg kerfi líkamans í dag. Til eru alkalíðaklasar sem verja líkamann gegn sníkjudýrum, aðrir sem verja gegn sykursýki, krabbameinum, háþrýstingi, ýmiss konar geðsveiflum, asma og exemi. Sé litið yfir alla alkalíðana er auðvelt að gera sér grein fyrir því að ef efnum er bætt í framleiðsluferli fæðunnar sem þurrka út framleiðslu þeirra hverfur lækningarmáttur fæðunnar sem við höfum nýtt okkur í þúsundir ára. Með notkun á glýfosati höfum við rænt jarðveginn og plönturnar getunni til að framleiða þessi mikilvægu lækningarefni.”

GLÝFOSAT ER MEIRIHÁTTAR HEILSUFARSÓGN

Monsanto hefur lýst því yfir að glýfosat geti ekki haft áhrif á heilsu manna, þar sem í mönnum séu ekki shikimate-ferlar (e. pathway). Rétt er þeir ferlar eru ekki í mönnum, en hins vegar hafa bakteríur í meltingarvegi manna þessa ferla, svo og bakteríur í jarðvegi og plöntum. Þar sem mannslíkaminn getur ekki framleitt þessa alkalíða og nauðsynlegu amínósýrur þurfa þessi efnasambönd að koma frá jurtum sem nærast á bakteríum í jarðveginum.

Glýfosat eyðileggur ekki bara framleiðslu plantna á amínósýrum og alkalíðum, heldur sundrar það einnig millifrumusamskiptum. Mikilvægi þeirra samskipta byggist á því að bakteríur, sveppir og aðrar örverur geti unnið saman í samstilltu flæði, þar sem sumar hafa hemil á öðrum. Frá því að pensilín var uppgötvað hefur verið stundað stríð gegn bakteríum, þar sem bæði læknar og sjúklingar hafa talið pensilínið geta læknað hér um bil allt.

Í dag er áætlað að gefnir séu út lyfseðlar fyrir rúmlega 3,8 milljónum kílóa af sýklalyfjum handa Bandaríkjamönnum árlega, eða um átta hundruð lyfseðlar á hverja þúsund íbúa. Allt frá árinu 1960 hefur sýklalyfjum líka verið bætt í fóður dýra þar í landi (innsk. Reyndar um allan heim), meðal annars til að hraða þyngdaraukningu þeirra. Gert er ráð fyrir að um 300 milligrömm af sýklalyfjum séu notuð við framleiðslu á hverju kílói af framleiddu nautakjöti í Bandaríkjunum og víðar, sem þýðir um 15 milljónir kílóa á ári.

Að auki nota bændur í heiminum meira en tvo milljarða kílóa af glýfosati á ári, sem gerir glýfosat-illgresiseyði að útbreiddasta sýklaeyði á jörðinni. Í upprunalegu einkaleyfi Monsanto á glýfosati kom fram að tilgangur þess væri meðal annars að drepa bakteríur í jarðveginum. Þegar glýfosat er notað á gróðurinn,geta hvorki jarðvegurinn né plönturnar framleitt þá heilandi alkalíða, né þær nauðsynlegu amínósýrur sem líkaminn þarf á að halda. Dr. Bush og rannsóknarteymi hans telja það skýra að miklu leyti hvers vegna svona mikill fjöldi fólks glímir við króníska sjúkdóma í dag.

Til að auka enn á vandann er glýfosat lífrænt fosfat eða eiturefni sem er því miður vatnsuppleysanlegt. Það hefur skelfilegar afleiðingar, því vatnsuppleysanlegt eiturefni getur borist út í allt vatnskerfi jarðarinnar. Áætlað er að um 75% af regnvatni séu nú menguð glýfosati, svo jafnvel lífrænt ræktuð fæða er menguð glýfosati ef rignt hefur á plönturnar. Allt vistkerfið er því orðið mengað af kemísku efni sem drepur þarfar sem óþarfar bakteríur.

GLÝFOSAT EYÐILEGGUR ÞARMAVEGGINA

Glýfosat tengist líka helsta meltingarvandamáli flestra í dag, sem eru lekir eða gegndræpir þarmar, eins og áður segir – Sjá greinina: 9 MERKI UM LEKA ÞARMA. Rannsóknir dr. Bush hafa sýnt fram á að glýfosat eykur framleiðslu á zonulíni, sem gerir það að verkum að þekjuvefirnir opnast, net þeirra gliðnar og eiturefnið lekur út í blóðið. Það þarf því að fara í gegnum lifrarfrumurnar og um allt blóðrásarkerfið, þar með talið til heilans, til að hreinsast úr líkamanum.

Einn af þeim sjúkdómum sem virðist tengjast lekum þörmum er einhverfa. Dr. Bush gerir ráð fyrir að haldi þróunin áfram megi gera ráð fyrir að á tímabilinu 2030–2045, eða eftir einungis 13–28 ár héðan í frá, muni eitt af hverjum þremur börnum í Bandaríkjunum greinast með einhverfu. Á hinum enda æviskeiðsins eru svo þeir eldri, en meðal þeirra hefur tíðni Alzheimersjúkdómsins stóraukist.

Dr. Bush greindi í viðtalinu (sem vístað er til í HREINN LÍFSSTÍLL) meðal annars frá því að í læknamiðstöð sinni takist hann í hverjum mánuði á við sarkmein í beinum eða krónískt beinmergskrabbamein. Þetta voru sjúkdómar sem fólk á aldrinum 70-90 ára fékk hér áður fyrr, en nú eru það börn frá 3-5 ára sem hann er að meðhöndla. Jafnframt segir hann að heilaæxli hjá börnum séu að verða eins og faraldur.

Allir þessir sjúkdómar og fleiri tengjast þeim afdrifaríku breytingum sem orðið hafa á fæðu okkar, einkum því að hún inniheldur ekki lengur þau næringarefni og býr ekki yfir þeim læknandi eiginleikum sem hún eitt sinn gerði. Eina leiðin til að snúa þessu við er að berjast gegn notkun glýfosats í ræktun korns, grænmetis og ávaxta, notkun sýklalyfja í matvælaframleiðslu, svo og ofnotkun þeirra í heilsugæslu.

Ef þér fannst þessi grein áhugaverð, deildu henni þá endilega með öðrum.