EITT AF MÍNUM UPPÁHALDS BÆTIEFNUM - Guðrún Bergmann

EITT AF MÍNUM UPPÁHALDS BÆTIEFNUM

EITT AF MÍNUM UPPÁHALDS BÆTIEFNUM

Um leið og sól fer að hækka á lofti fara flestir að verja meiri tíma utandyra. Þá byrja ég líka að taka inn Astaxanthin til að verja húðina fyrir geislum sólarinnar.

Ég hef notað Astaxanthin reglulega í tæp fimmtán ár, ekki bara til að verja húðina fyrir áhrifum sólarljós, heldur líka vegna þess að það er frábært andoxunarefni.

FALLEG HÚÐ, FRÁBÆR SÓLARVÖRN

Rannsóknir hafa sýnt að Astaxanthin verndar húðina sem er stærsta líffæri líkamans. Það bætir rakastig hennar, mýkt og teygjanleika og dregur úr fínum hrukkum, blettum og freknum – auk þess sem það örvar brúna litinn í húðinni.

Ef við sólbrennum myndast bólgur í húðinni, en ef við tökum inn Astaxanthin fer það inn í húðfrumurnar og dregur úr þeim skaða sem útfljóubláu geislarnir valda húðinni.

Astaxanthin verndar húðina sérstaklega gegn frumudauða sem orsakast af útfjólubláum (UV) geislum sólarinnar. Ólíkt sólkremum sem borin eru á húðina, blokkar Astaxanthin ekki UV geislana, þannig að það kemur ekki í veg fyrir að UVB geislarnir breytist í D–vítamín í húðinni. Það ver húðina einfaldlega gegn skemmdum.

Gott er að taka Astaxanthin inn með mat, sem í er einhver fita því það er fituuppleysanlegt bætiefni.

HVAÐ ER ASTAXANTHIN?

Astaxanthin er unnið úr Haematococcus örþörungum, sem framleiða Astaxanthin til að vernda viðkvæma þörungana fyrir sólarljósi. Karótínóíðin í Astaxanthin eru litarefni sem myndast í náttúrunni og stuðla að góðri heilsu.

Astaxanthin er öflugt andoxunarefni með víðtæk heilsufarsleg áhrif og verður ólíkt öðrum andoxunar-efnum eins og beta-karótíni, zeaxanthini, E-, C- og D-vítamínum og seleníum, aldrei að oxandi efni í líkamanum.

VIRKAR Á MÖRG KERFI LÍKAMANS

Auk þess að vera gott fyrir húðina er Astaxanthin öflugt og breiðvirkt andoxunarefni sem virkar vel á mörg kerfi líkamans og stuðlar meðal annars að heilbrigði augna, heila og hjarta.

Það hefur einnig reynst vel gegn hvers konar meltingarvandamálum, sykursýki, ýmsum meltingar-sjúkdómum, lifrarsjúkdómum, ófrjósemi karla og nýrnabilun.

7 FRÁBÆRIR EIGINLEIKAR ASTAXANTHINS

Nokkur lykilatriði greina Astaxanthin frá öðrum karótínóíðum og gerir það að bætiefni sem gott er að taka reglulega. Þessi lykilatriði eru:

1 – Astaxanthin gefur frá sér elektrónur sem gera frjálsar stakeindir hlutlausar. Frjálsar stakeindur eru oxandi efni sem hafa eyðileggjandi áhrif á vefi og líffæri líkamans.

Stakeindirnar eyða upp flestum öðrum andoxunarefnum, en Astaxanthin býr yfir miklum birgðum, sem þýðir að það er virkara lengur – samanborið við önnur andoxunarefni.

2 – Astaxanthin getur varið bæði vatns- og fituuppleysanlega hluta líkamsfrumunnar. Karótínóíðin skiptast yfirleitt í vatnsuppleysanlega eða fituuppleysanlega hópa, en Astaxanthin tilheyrir hópi sem er mitt á milli og getur haft áhrif á bæði vatn og fitu.

Þetta þýðir að Astaxanthin sameindirnar geta haft áhrif á og þanið út himnu allra frumna og fljóta því ekki um í blóði okkar, heldur samlaga sig frumuhimnunni.

Þetta á líka við um hvatberana (mítókondruna eða orkudreifingarhlutann) í frumum hjartans, sem er ein ástæða þess að Astaxanthin er svo gott fyrir hjartað.

3 – Astaxanthin fer í gegnum heilablóðþröskuldinn. Á þennan hátt verndar Astaxanthin taugafrumurnar og hægir á áhrifum aldurstengdrar heilabilunar og skynhreyfigetu.

Að auki hafa rannsóknir á dýrum sýnt að Astaxanthin getur dregið verulega úr þeim skaða sem fylgir heilablóðfalli.

4 – Einn af lykileiginleikum Astaxanthin er að það getur ekki valdið oxun, jafnvel þótt mikið sé af því í líkamanum og er því bæði öruggara og öflugra andoxunarefni en mörg önnur.

5 – Astaxanthin virkar á í það minnsta fimm mismunandi bólguferla, svo það er öflugt þegar kemur að því að slá á bólgur í líkamanum og viðhalda jafnvægi í líkamskerfinu.

Auk þess að vinna á bólgum dregur Astaxanthin um leið úr sársauka, því það blokkar virkni mismunandi efna í líkamanum, sem mynda sársaukaviðbrögð.

6 – Astaxanthin kemur góðu jafnvægi á orku líkamans og veitir aukið úthald. Þess vegna virkar það vel á þá sem komnir eru með síþreytueinkenni vegna vinnu eða álags. Astaxanthin eykur úthald, styrk og bætir árangur líkamans almennt.

7 – Astaxanthin býr yfir þeim eiginleikum að komast í gegnum ýmsar hindranir í líkamanum og ná meðal annars til sjónhimnunnar.

Ýmsar klínískar rannsóknir sýna að Astaxanthin bætir augnheilsu sykursjúkra, dregur úr þreytu og álagi á augum og stuðlar að skýrari sjón.

Mynd: aditya-saxena-_mIXHvl_wzA-unsplash 

Heimildir: Grein eftir Suzy Cohen, R.Ph. á Huffington Post

Grein á vef Dr. Mercola

 

 

 

image_print

Um höfund

Guðrún Bergmann
Guðrún Bergmann
Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
  • 401 Posts
  • 0 Comments
Guðrún Bergmann hefur í rúm 30 ár verið ötull talsmaður þess að velja náttúrulegar leiðir til betri heilsu og bættra lífsgæða. Sjá nánar
error

Viltu deila þessari grein?